大家有幾耐冇入書店？幾耐冇買書睇？
好似冇咩人知道，到底肺炎疫情對出版業界有咩影響。講真，喺第五波Omicron之前，影響又真係唔明顯，業界如常運作，銷售都係以正常速度持續向下（年年都跌書㗎啦）。
直到今年（2022年）３月，所謂嘅第五波疫情來襲，香港終於喺肺炎面前淪陷。一到３月，由唔同渠道收到各方消息，到咗而家４月仍然未完全Recover。講吓３月開始發生咩事。
印廠中招
印書靠印廠，當幫襯開嘅印廠Sales哥仔話我知，有超過一半員工中咗Omicron，即係話人手冇咗一半，廠期一定要褪後。仲要唔係一半員工一齊中，大家輪流中先至出事，印廠長期有一半人係返唔到工，唔單止係印刷嘅師傅，仲有包裝嘅姐姐、QC、落單嘅人，都唔可以正常返工，就算處埋拼版嘅人，中咗招都可以喺屋企用電腦做嘢，都令印廠大塞車。
就算係網上快速落單嗰啲（E-Print、bannershop etc.），落單後原本兩日可以完成嘅宣傳用品，都要10日先至完成。
通常印廠大塞車喺幾時？每年都係５、６月，因為７月有書展同動漫節吖嘛。聽講第六波喺６月殺到，咁，今年會唔會有書展呢？動漫節呢？
中國大陸中招
中國大陸中招，關我哋香港出版咩事？因為印書嘅原材料有好大部份都係嚟自中國大陸，香港集體中招，大家都見中港司機有幾慘（每日搵命搏）。連中國都大規模中招，好多廠都停開，或者啲工人又返鄉下唔返嚟（通常春運之後啲工人都唔見晒）。假設以往訂紙要兩個月，而家訂紙至少預半年。運紙嚟香港過關，又成日被扣查，扣關呢啲嘢神經刀嚟，好彩第二日放行，唔好彩成個Cargo扣起。如果你用開順豐之類嘅中國式速運（唔好啦），都會知成個３月都唔送件／收件上中國大陸。
又話用歐洲紙、日本紙嘅？歐洲紙廠同日本紙廠都係喺中國生產㗎喎。冇紙，印廠又係企咗喺度。紙呢樣嘢，又唔可以一次過訂好多，生產完後，放喺度唔用，啲紙會氧化變黃、會吸潮，影響印刷品質，甚至唔用得。所以一般印廠都係有柯打，問晒未來幾個月出版計劃先訂紙，或者常用紙每批訂多少少備用。
又有人話，都話快啲搞電子版㗎啦。咁，香港有咩本地電子書平台？
